www.mr.abdalla.com

منتدى mr.abdalla تجد هنا كل ما هو جديد
 
الرئيسيةالبوابةمكتبة الصورس .و .جبحـثالتسجيلالأعضاءالمجموعاتدخول

شاطر | 
 

 احمد فؤاد نجم ( شاعرنا الاسطورة ) نبذة عنة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 4:21 am

بسم الله الرحمن الرحيم

و انا ماشى فى صفحات النت قابلنى مجموعه كبيرة من اشعار عم نجم قولت لازم احطهم فى المنتدى ان شاء الله يعجبوكوا

نبذة حول الشاعر: أحمد فؤاد نجم


ولد أحمد فؤاد نجم في مايو سنة 1929

عمل نجم في معسكرات الجيش الانجليزي متنقلا بين مهن كثيرة كواء..لاعب كرة.. بائع ..عامل انشاءات وبناء.. ترزي. و في فايد و هي احدى مدن القنال التي كان يحتلها الانجليز التقى بعمال المطابع و كان في ذلك الحين قد علم نفسه القراءة و الكتابة و بدأت معاناته الطويلة تكتسب معنى. و اشترك مع الآلاف في المظاهرات التي اجتاحت مصر سنة 1946 و تشكلت اثناءها اللجنة الوطنية العليا للطلبة و العمال. يقول نجم: كانت أهم قراءاتي في ذلك التاريخ هي رواية الأم لمكسيم غوركي, و هي مرتبطة في ذهني ببداية و عيي الحقيقي و العلمي بحقائق هذا العالم, و الأسباب الموضوعية لقسوته و مرارته. ولم أكن قد كتبت شعرا حقيقيا حتى ذلك الحين و انما كانت أغان عاطفية تدور في اطار الهجر و البعد و مشكلات الحب الاذاعية التي لم تنته حتى الآن...

و في الفترة ما بين 51 الى56 اشتغل شاعرنا عاملا في السكك الحديدية. وبعد هذه الفترة بدأ في نشر دواوينه سجن عدة مرات بتهم مختلفة ومازال نجم يسكن حجرة متواضعة في حارة حوش قدم

اشعاره:
=====================
استغماية

غمي عيونك

سد ودانك

إفتح بقك

قول انا فين

الشاطر فيكو

يحزر فزر

في دقيقتين

والإشطر منه

اللي يحزرها

في غمضة عين

والإشطر خالص ما يحزرش

يقول انا فين

والإشطر أشطر

اللي يبص يشوف بالعين

انا فين ؟

فيه ناس

اختلف في الموضوع

وحكاوي اتقالت

عن مواضيع

والناس لا مؤاخذة

في زمن الجوع

يتعشوا كلام

يفطروا تشنيع !

فيه واحد شافني

بلبده ولاسه

في باب اللوق

والتاني

لمحني بقفصين موز

علي باب السوق

والتالت شافني

في كاديلاك

راكب مع بنتين

والرابع

شافني ف طنطا

بابيع

بلابيع ونشوق !

وصحافه الصاوي

والورداوي

والجمال

وأباظه ولاظه

وباقي الدلاديل

والأندال

بتأكد جدا

جدا جدا بالتدقيق

إن انا محبوس

وباروح يوميا

للتحقيق!

طب اصدق مين

وأكدب مين ؟!

ماهي حاجه تمخول أيها عاقل

وانا مجنون

وباكلم نفسي

وعقلي صراحه

ماهوش مضمون

لو كنت بلبده ولاسه

وماشي ف باب اللوق

طب إيه مشاني

مفلس جدا

جنب السوق ؟!

لوكنت بدأت

كتاجر فاكهه

وبقفصين ؟

مش كنت زماني

معلم طمبه

وجوز اتنين؟

لوكنت ف كاديلاك

زي ما قال

التالت بيه

ومعايا بنات

زي الشربات

طب ح انزل ليه ؟!

لوكنت يا طنطا

بابيع بلابيع

وسطل وبخور

مش كنت زماني

مدير على جامع

أو مأمور ؟

وصحيح الصاوي

والورداوي

والجمال

حابسين أفكار الناس

في بلدنا

وعال العال

إياك قاصدين

إن انا مسجون

زي الملايين ؟

كده يبقي تمام

ولأول مره

ح اقول " صادقين "

بس انا لا مؤاخذه

وبالتدقيق

ماحصلشي معايا

ولا تحقيق !

مش حاجه تحير

طب أنا فين ؟

حزرتوا خلاص

فزرتوا خلاص ؟

عارفين

أنا فين

أنا ساكن قلبي ومتونس

بالناس

والناس الونسه كتير

ماليين القلب

وشاغلينه

سارحين في الدم

وفي التفكير

وجناين قلبي العمرانه

بالناس

الأزهار

العصافير

سايعاني

وسايعه اللي باحبه

وتساعي معايا

رفاقه كتير

شايفين انا فين ؟

الشاطر فيكو

يحزر فزر

في دقيقتين

والأشطر طبعا

حيحزرها

في غمضة عين

أنا ...... فين ؟

======================
بابلو نيرودا





شيلي البارود

حطي الوعود

والتعليلات

في المهملات

سفحوا الورود

من ع الخدود

والخضره

من قلب البنات

فين الأمان

جنب الغيلان

يا ملفقين

عصر التبات ؟

لا الجرح بات

ولا إتنسي

ولا التاريخ

والذكريات

سيدنا الحسين

اسبارتاكوس

الليندي

لوركا

عب رحيم

فلاح بلدنا اللي انشوى

قبل القيامه

في جحيم

سينا الطعينه المزمنه

ارنستو

جيفارا العظيم

خميس وبقري

والشفيع

أدهم

ومواله القديم

قطب الرجال اللي ابتلي

لما تلا الذكر الحكيم

عقد العقيق اللي اتبدر

من عهد سقراط الحكيم

زاد النهارده

وانتظم

بالدره والفص اليتيم

نيرودا

زمار الصباح

نيرودا

مزمار النسيم

صابحه الصبيه

" سانتياجو "

تشرب لبنها من غناك

اتروعوا العصافير

وهاجوا

لما نعيت البوم

نعاك

وانت الشهيد

ملو البراح

جراح تعود المجروحين

ساعتين تشاور

ع الجراح

ينشد ضهر المطعونين

تتمدد إيدهم ع السلاح

وبعزم ما في الموجوعين

تطعن في شريان الطاعون

تجهز

على الداء الدفين

الشمس تطلع بالصباح

ترمي الصباح

على كل الإبد

حاضنه البنادق والجراح

بإيد وعافقه الناي

بإيد

والشمس تطلع في النهار

فوق كل قصر

وكل بيد

والشمس تسقط

في الغروب

عن بابلوا نيرودا .. الشهيد

دواره بتعدي السنين

يا أرضنا

يا ام البنين

دواره بتعدي اللي فات

يا أرضنا يا ام البنات

كروب

حروب

محن شعوب

كلاب

عذاب

ضباب

غروب

بروق

رعود

شروق

صعود

نضال

سجال حرام

حلال

والعدل .. كان

في كل آن

هو القضية

والرهان

والارض عاشت من زمان مسرح لفرسان الميدان

سيدنا الحسين

اسبارتاكوس

جيفارا

لوركا

عب رحيم

نيرودا زمار الصباح

نيرودا

مزمار النسيم

=========================
نيكسون جاء





أب ت ث جح

ألف باء

جونسون روح

نيكسون جاء

قولوا هأوأو

أو قولوا هاء

على صحافتنا

الغير غراء

ذات صباح

يا فتاح

بالجرانين على ريق النوم

جم على سهوه

كبسوا القهوه

وابتدأوا ف تضييع اليوم

إللي يقول النصر نميس

ينفع تاكسي

ويمشي رميس

وإللي يقول الفورد يا بيه

أجعص من أجعصها جعيص

وإللي يقول جونسون دا حمار

راجل

عقله عقل صغار

راجل تيس

من غير حيث

ينصب ألف جنازه بطار

بس اهو ارح

وحنرتاح

وحنتبحبح بقي ونقول

يخرب بيته

ويدلق زيته

ويعيش نيكسون لنا

على طول

نيكسون عال

ومش بطال

وإللي يقول غير كده

مقفول

شفت كلامه

إلا كلامه

صح كلام راجل مسئول

ولا عنيه

يا ختي عليه

فيهم سكس ماهوش معقول

وإللي يقول يا بقر يا شراكسه

نيكسون ماله ومال النكسه

وإللي يقول بلوتنا كبيره

وإللي يقول فضوها سيره

وإللي يقول مين مسئول

وإللي يقول

وإللي يقول

شوفوا بقي يعني

ما تفلقونيش

آدى صحافتنا

وغيرها ما فيش

مش عاجباكو ما تلومونيش

قولوا هأو أو

أو قولوا هاء

على صحافتنا

الغير غراء


تحياتى


ويارب يعجبكم الموضوع
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 4:22 am

شقع بقع




انا الأديب و لا تعرفنيش

تقرالي لكن ما تشوفنيش

كلامي لا هو مادهون ورنيش

و لا المعاني عليها غبار

شقع بقع يا ديل الفار

***

يا شعب مصر يا خم النوم

ما تفوق بقى و تشوف لك يوم

الثورة قامت في الخرطوم

و انت اللي نايم بالمندار

شقع بقع يا ديل الفار

***

يا شعب ثور داهية تسمك

و شيل اصول اسباب همك

عصابه

بتمص في دمك

و الاسم قال ضباط احرار

شقع بقع يا ديل الفار

***

اخدوا اليهود غزة و سينا

و بكرة يبقوا هنا وسطينا

و الراديوهات بتغدينا

خطب و نتعشى اشعار

شقع بقع يا ديل الفار

***

الشيخ امام قال كلمة حق

و الست ثومة قالت لأ

و ابو النجوم على ودنة اندق

في المعتقل و الدنيا نهار

شقع بقع يا ديل الفار

=================
جائزة نوبل




شوف عندك يا سلاملم

واتفرج يا سلام

مواطن

شخص عادي

مالوش أي اهتمام

ومبارك الخيانه

ومسميها السلام

وف يوم قرا الجرايد

تاريخ ما اعرفش كام

من يومها يا ضنايا

بيشقلب فى الكلام

واتفرج يا سلاملم

على شقلب يا سلام

لما محانم جيبن يا دخ

زايجة لوبن

يعنى مناحم بيجن

ياخد جايزة نوبل

تبقى النوديا

يعنى الدنيا

ماشيه بتحدف بالمندار

يبقى الشهر اتناشر ساعه

يبقي اليوم

ليلتين ونهار

يبقى القاتل

شخص ضحية

والمقتول مجرم جبار

شفتوا إزاى ؟

أما صحيح الطب اتقدم

وحنا ما وصلتناش أخبار

أيوه يالجنة لوبن بيه

قاعدة ازاى بتلجنى إيه

أنا مش فاهم حاجه صراحه

لما القاتل يا خد جايزه

كده من دون تلبيخ وأباحه

يبقي

يا إما اللجنه دى بايظه

أو لا مؤاخذه

رئيسها حمار

يبقي يا لجنه يا عره يا كوسه

جتنا وجتكو ستين حوسه

يبقي ف هذا الزمن المايل

ياما حتجري علينا هوايل

تبقي اللكلمه بدل الكلمة

والكاتب يمسك منشار

يبقي الراعش

يعنى الشاعر

يسكن شقه ف بيت

فى قصيده

يكتب فول

ياكل أشعار


==================
التحالف ( يعيش أهل بلدي )




يعيش أهل بلدي

وبينهم ما فيش

تعارف

يخلي التحالف يعيش

تعيش كل طايفه

من التانيه خايفه

وتنزل ستاير بداير وشيش

لكن فى الموالد

يا شعبي يا خالد

بنتلم صحبه

ونهتف .. يعيش

يعيش أهل بلدي

يعيش المثقف على مقهى ريش

يعيش يعيش يعيش

محفلط مزفلط كتير كلام

عديم الممارسه

عدو الزحام

بكام كلمة فاضيه

وكام اصطلاح

يفبرك حلول المشاكل قوام

يعيش المثقف

يعيش يعيش يعيش

يعيش أهل بلدي

يعيش التنابله

فى حي الزمالك

وحى الزمالك

مسالك مسالك

تحاول تفكر تهوب هنالك

تودر حياتك

بلاش المهالك

لذلك إذا عزت توصف حياتهم

تقول الحياة عندنا

مش كذلك

وممكن تشوفهم فى وسط المدينه

اذا مر جنبك

أتومبيل سفينه

قفاهم عجينه

كروشهم سمينه

جلودهم بتضوي

دماغهم تخينه

سنانهم مبادر تفوت فى الجليد

ما فيش سخن بارد

بياكلوا الحديد

ما دام نهر وارد

وجاي م الصعيد

تزيد الموارد

كروشهم تزيد

وتسمع وتسلم

بأن التنابله

أو الأكالين

حيسمح كبيرهم

ويعمل مقابله

مع الفلاحين

ويحصل تحالف

ما بين الجميع

ونملا المصارف

بدم القطيع

أطيع الخليفه

أطيع والديك

أطيع التنابله

دا مفروض عليك

وتزرع وتبعت لحي الزمالك

وحي الزمالك

مسالك مسالك

تحاول تفكر تهوب هنالك

تودر حياتك بلاش المهالك

لذلك

إذا حد جاب لك سيرتهم

تبسمل تكبر

وتهتف كذلك

يعيش التنابله

يعيش يعيش يعيش

يعيش أهل بلدي

يعيش الغلابه

فى طي النجوع

نهارهم سحابه

وليلهم دموع

سواعد هزيله

لكن فيها حيله

تبدر تخضر جفاف الربوع

مكن شغل كايرو

ما يتعبش دايره

لا ياكل

ولا حتى يقدر يجوع

يا غلبان بلدنا

يا فلاح يا صانع

يا شحم السواقي

يا فحم المصانع

يا منتج

يا مبهج

يا آخر حلاوه

يا هادي

يا راضي

يا عاقل

يا قانع

ما تتعبش عقلك

فى شغل السياسه

وشوف انت شغلك

بهمه وحماسه

وعود عيالك فضيله الرضا

لأن إحنا طبعا

عبيد القضا

ورزقك ورزقي ورزق الكلاب

دا موضوع مؤجل ليوم الحساب

كمان الصحافه

حتكتب فى حالتك

وتنشر مناظر لخالك وخالتك

وتتطلع يا مسعد عليك الغناوي

وتسمع باسمك

فى قلب القهاوي

تحبك مشيره وبنات الجزيره

وقصه غرامك

تشيع فى الرداوي

يعيش عم مسعد

يعيش يعيش يعيش

يعيش أهل بلدي


===================
تذكرة مسجون





الاسم : صابر

التهمه : مصري

السن : اجهل اهل عصري

لرغم انسدال الشيب ضفاير

من شوشتى

لما لتحت خضري

المهنه : وارث

عن جدودي

والزمان

صنع الحضاره

والنضاره

والامان

البشره : قمحى

القد : رمحى

الشعر : اخشن م الدريس

لون العيون : اسود غطيس

الانف : نافر كا لحصان

الفم : ثابت فى المكان

واما جيت ازحزحه

عن مطرحه

كان اللى كان

جهه الميلاد: فى أي اوضه مضلمه

تحت السما

على ارض مصر

من أي دار وسط

النخيل

مطرح ما يجري النيل

ما دام ما يكونش قصر

الحكم: من سبع تلاف سنه

وانا راقد سجين

اطحن على ضراسي الحجر

من الضجر

وابات حزين

الاسباب : سالنى سائل

حبستك طالت

وليه

ولانى طيب

وابن نكته

ما فيش مخالفه ركبتها

ضد القانون

لانى خايف

والقانون سيفه ف اديه

تسأل عليّ المخبرين

فى أي حين

تسمع وتفهم قصتي

الف وبيه

الاسم صابر ع البلا

ايوب حمار

شيل الحمول من قسمتى

والانتظار

اغرق فى انهار العرق

طول النهار

والم همى فى المسا

وارقد عليه

عرفت ليه ؟


===============

يتبع......
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 4:22 am

الخواجة الأمريكاني




الخواجه الامريكانى

والسماسرة اللى وراه

تخنوا بالكدب ودنه

وعرضوا له مقاس قفاه

فهموه

من غير ما يفهم

ان سوق الشرق مغنم

والخوجه بطبعه مغشم

والمصاري معفرتاه

حب يعمل فيها تاجر

وانطلق

يسلب وينهب

ف الزباين بالنهار

يحدف الدولار يلمه

تلتميت مليون دولار

بالقزايز والبنات

باللبان

والبمبونات

بالمدافع والدانات

او بأفلام الرعاة

قول بقي تاجر وفاجر

وانفلت لص المواشي

رعب ماشي فى البلاد

يشفط البترول ويطرش

كل الوان الفساد

عزرائيل من غير فرامل

يقلب العرسان ارامل

حتى فى بطون الحوامل

كان بيدبح الحياة

بالسناكي والخناجر

والنهايه يا خواجه

مش ف يوم كانت بدايه ؟

البدايه برضه لازم

ييجي يوم

توصل نهايه

مهما زاد الراسمال

الهلاك هو المآل

والتاريخ

هو اللى قال

لعبه الموت فى الحياة

تسحب الروح م الحناجر


=====================
الأخلاق



مناعه ارزاق

جلابة ارزاء

يا سخامه يا لطامه

ياللى اسمك اخلاق

ازيك وايش حالك

ايه اخر الانباء

دجوكى ؟

سلخوكى ؟

خلوكى اشلاء

ما انا قايل وسمعتي

بس انتي اللى طمعتى

فى بلدنا يعوزكي

مسكوكي دقوكي

بدماغ الدقماق

بالقاضيه الفنيه

صرعوكى السجانه

حبوسكى

فى قضيه

مرفوضه وخسرانه

والتهمه الجنائيه

اكمنك انسانه

وخدوكى الشرطيه

وعساكر هجانه

وابولكنه فرنساوي

طبال ومغناوي

بيغنى اشتراكاوى

والعالم طرشانه

وابو عسكر حرميه

بيبرطع فى تكيه

ويقول اشتركيه

والناس

لسه جعانه

يا هبيله يا فضيله

يابتاعه المهابيل

بلا وكسه

بلانيله

بلا هفه مخاليل

دى بلدنا

ولا حولا

ما بقاش فيها علاوله

وعوضنا على المولي

فى ولادنا الشماليل

يادينا ورجلينا

اسسنا وعلينا

وعملنا اللى علينا

جيل يطلع ورا جيل

ويقول ابنوا لبكره

والبنى ادم ذكري

نتحمس للفكرة

من كتر التطبيل

واخيرا ولا اخر

اخلاقنا بتتاجر

ومهازل

ومساخر

وهزيمه

وتضليل


==================
الثوري النوري





حلا ويللا يا حلا ويللا

يا خسارة ياحول اللا

الثورى النورى الكلمنجى

هلاب الدين الشفطنجى

قاعد فى الصف اللأكلنجى

شكالاطه وكراميلا

***

يتمركس بعض الأيام

يتمسلم بعض الأيام

ويصاحب كل الحكام

وبستاشر ملة

***

ياحلولو لو شفته زمان

مهموم بقضايا الانسان

بيتكتك لا تقول بركان

ولابوتاجاز ولا حلة

***

ايش حالك ياجريبى اليوم

وايش جاب التفاح للدوم

وايش جاب الأوضة ف بدروم

للعربيه وفيللا

***

جرانين ومسارح وادارة

ومعلق طبلة وزماره

يسلك أهو بيزمر

يعطل يجيبوا له المنفيلا

واترستق هلاب الدين

بقى عاقل جدا ورزين

ويا عينى علينا يا مجانين

عشنا ومتنا بعله
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 4:26 am

الأقوال المأسورة



المجد للشاه

فى الاعالى

وبالناس المذله

وعلى الارض

الخراب

" شاهبور با ختيار "

من سفر ما قبل الخروج

حبيبك وصاحبك

وصاحب حبيبك

كلام كله فارغ

عديم المعانى

اذا الندل صاحبك

يصاحبك لعله

وتسمع كلام

زي كذب الاغانى

وانا اللى اشتريت الخسيس

بالخساره

وبعت الاصيل

اللى يا ما اشترانى

واول ما هبت

رياح النهايه خلعنى الخسيس

من صباعه ورماني

الشاهنشاه رضا فهلوي

من سفر الخروج

اخويا الامير

بزرميط الايرانى

وعظنى ونصحنى

وسلك ودانى

لان اللى نابه

يا حبه عنيا

ما يتيخلوش

أي كاتب اغانى

دا كان لسه قاعد معايا

النهارده

ولابس خواتم دهب

امريكانى

صحيح الشعوب

بنت كلب ولئيمه

وممكن

تزيح العروش فى ثوانى

" واحد صاحبنا "

من سفر ما بعد الخروج


=-=================
الندالة




يا كارتر يا ندل

حبيبك وصاحبك

وصاحب مراتك

وتبقي انت صاحبه

وصاحب مراته

وكان والده ايضا

مصاحب حماتك

وكان برضه والدك

مصاحب حماته

وطول عمره نافد

على استخباراتك

وشغال جاسوسك

على استخباراته

وقاعد يزود

رصيد ملياراتك

وسارق

وشايل معاك ملياراته

وراجل مامنك

وخاين ضميره

وخايف

وحاطط ف ايدك مصيره

ودابح ف بحبك

ألوف الضحايا

ودايس ف طين الدنس

والخطايا

يقوم لما يطبق عليه المحيط

تطنش يا كارتر

وتعمل عبيط

وتخلع

وتنسي الحمار والغبيط

وتاكل عيالك

بدون وجه عدل

صحيح

انت ندل


=====================
هما مين واحنا مين




هما مين واحنا مين

هما الامر والسلاطين

هما المال والحكم معاهم

واحنا فقرا ومحكومين

حزر فزر شغل مخك

شوف مين فينا بيحكم مين

احنا مين وهما مين

احنا الفعلا البنايين

احنا السنه واحنا الفرض

احنا الناس

بالطول والعرض

من عافيتنا تقوم الارض

وعرقنا يخضر بساتين

خزر فزر شغل مخك

شوف مين فينا

بيخدم مين

هما مين واحنا مين

هما الامرا والسلاطين

هما الفيلا والعربيه

والنساوين المتنقيه.. طبعاً

حيوانات استهلاكيه

شغلتهم حشو المصارين

حزر فزر شغل مخك

شوف مين فينا بياكل مين

احنا مين وهما مين

احنا قرنفل على ياسمين

احنا الحرب حطبها ونارها

احنا الجيش اللى يحررها

واحنا الشهدا ف كل مدارها

منتصرين او منكسرين

حزر فزر شغل مخك

شوف مين فينا بيقتل مين

هما مين واحنا مين

هما الامرا والسلاطين

هما مناظر بالمزيكه

والزفه وشغل البولوتيكا

ودماغهم طبعا استيكه

بس البركه فى النياشين

حزر فزر شغل مخك

شوف مين فينا بيخدع مين

هما مين واحنا مين

هما الامرا والسلاطين

هما بيلبسوا اخر موضه

واحنا بنسكن سبعه ف اوضه

هم بياكلوا حمام وفراخ

واحنا الفول دوّخنا وداخ

هم بيمشوا بطيارات

واحنا نموت في الأوتوبيسات

هم حياتهم تمضي جميلة

هم فصيلة واحنا فصيلة

حادي يا بادي يا عبد الهادي

راح تفهم قصد الغنوة دي

لمّا الشعب يقوم وينادي

يا احنا يا هم في الدنيا دي

حزر فزر شغل مخك

شوف مين فينا حيغلب مين!!!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 4:27 am

أبجد هوز ( سايجون)



أبجد هوز

حطي كلمن

إفتح صفحه

إمسك قلمن

إكتب زي

الناس ما بتنطق

سقطت سايجون

رفعوا العلمن

طلعت شمس اليوم دا

أغاني

كل ما نسمع

نعشق تاني

طلعت شمس اليوم دا

حريقه

تشفي الجرح

وتبري الألمن

سايجون عادت للثوار

فوق الدم

وتحت النار

جدوا فوجدوا

زرعوا

فحصدوا

وإحنا إدينا للسمسار

وإللي قالوه السمسارجيه

وإللي حكاه السمساردار

لما قروه القروانجيه

بالمستعدل والمندار

هتش ونتش

بعزم الصوت

عن أمريكا وهوا أمريكا

زعموا الفانتوم

شايل موت

سقط الموت بعلم أمريكا

جاتكو فضيحه

يا طبقه سطحيه

وعامله فصيحه

وجايبه العار

قراونجيه

وكتبنجيه

وسمسارجيه

وسمساردار

سايجون دره يا ثوار

عادت حره

للأحرار

داحنا حنشبع بكره أغاني

إسمع وحفظ يا كتباني

واثبت عندك فى الأوراق

مصر بتنضح بالأشواق

مصر عروسه

وبكره عريس

والعشاق إحنا العشاق

فينا وبينا ولينا الثوره

إحنا الثوره

وهي الناس

فينا الماضي

وبينا الحاضر

والمستقبل

هو الناس


==================
الكلمات المتقاطعة




بدل الكوره

ولعب الفوره

وسط الغاغه

والبرجاس

تاكل زغده

تاكلك دبشه

تملا دماغك

بالقلقاس

ياللا نفكر

حتة لعبه

زي السكر

بالأناناس

كلمه ومعنى

رأسي وأفقي

يحكوا حكاية

تهم الناس

قرب قرب

ياللا نجرب

شغل مخك

ولا تحتاس

_ واحد رأسي؟

رأسي بتضرب

تقلب

تشغي بالأفكار

مسرح

والأفكار هوامه

في الدوامه

ليل .. ونهار

أبيض إسود

أخضر ..أحمر

بارد .. حامي

جنه ..ونار

سيبك سيبك

من تغريبك

بكره الليل

يطلع له نهار

_ اتنين رأسي ؟

حاكم حالي

كان طرطور

خان الدار

والجار

والنور

_كل ما فينا من حكام

نازلين

من خنفس .. وكافور

كذبوا _ أفكوا

قتلوا _ سفكوا

غدروا _ خانوا

فضحوا _ هتكوا

_ واحد أفقي ؟

شاعر داعر

ميت .. حي

طالع .. نازل

رايح .. جي

مادح سيده

مادد إيده

لايشوف حاجه

ولا يقول شي

_ كل ما فينا من شعارير

خونه

وهتيفة .. وخنازير

تجروا _ باعوا

لمعوا _ ذاعوا

أفلوا _ غربوا

تاهوا _ ضاعوا

_ اتنين أفقي ؟

شعرا تلاته بكلمه باروده

ناظم

بيرم

بابلو نيرودا (1)

_ كل ما فينا من عشاق

داقوا ما بينا

من أشواق

حبوا _ عشقوا

شبوا _ نشأوا

مروا _ فاتوا

غرسوا _ رشقوا

_ رأسي وأفقي ؟

شاعر واعر

لازم جي

يملا عيون العالم ضي

كل ما فينا من أحزان

تستنظر عاشق فنان

يأتي _ يقبل

طائر _ بلبل

حرفي _ فني

يشدو _ يغني

وطني سكني

أهلي .. قومي

منكم فيكم

صحوي نومي

أنتم فكري

أنتم عملي

منكم توقي

فيكم أملي

هيوا _ لبوا

ثوروا _ هبوا

يشرق _ يسطع

صبح _ مطلع

يزرع _ يبني

نحصد _ نجني

نمرح _ نلعب

نشدوا _ نغني

واحد رأسي

نشدوا نغني

اتنين أفقي

نشدوا نغني

تالت خامس

عاشر ميه

نشدوا نغني

نشدوا نغني

نملا العالم

خضرة عفيه

نشدوا نغني

نشدوا نغني


====================
ورقة .. من ملف القضية






- أنا مصراوي


- ممكن أعرف مين الأول بيكلمني


- دول مين


- مصر العشه ولا القصر


إف

- مالك ... شايل طاجن خالك


- أنا ما اقصدش اهانتك طبعا


- لاما اعرفش


- إيه رأيك في قضية مصر


هى وسوريا وليبيا ولازم ييجي النصر

- ييجي منين وازاى ولمين


- أنا من حقي


- أنا بتكلم بيني وبينك


- إذا كانش يسبب لك ضيق


- مين مسئول ؟


- ع إللي جرى لنا ف غزه وسينا


فض دمغك من دي قضيه شعبنا جاهل

مهما تقول له

مش حيآمن بالشيوعية

- ما الشيوعية فى فيتنام

إيه رأيك فيهم يا همام


لكن إحنا .. ورانا عيال

- طب ما نحارب لجل عيالنا

يطلعوا أسعد من أجيالنا


وحتتعبني معاك ع الفاضي

وأنا بحبحت معاك بكفايه

إبقي اتفلسف عند القاضي

- هى قضيه ؟


أمال فاهم إيه آمال هى الدولة دى لعب عيال

- ممكن أعرف أنا هنا ليه


أمال إيه

يوم خمسه وعشرين الماضي

إيه مشاك عند التحرير

- تحرير إيه يا جناب القاضي


- بكره تصير


- أنا غلباوي كده من صغري


آخر غلبه وقله ذوق يحصل إيه لو تمشي ف حالك

فاكر نفسك مين

ما تفوق

- لو راح افوق

مش من مصلحتك


إيه رأيك فى حكايه الطلبه

- حاجه عظيمه بشرة خير


- وانت لسانك ينفع سير


- كتر خيرك


مين وداك بقي عند الطلبه رايح ضمن المندسين

- رحت أناقشهم واسمع منهم


دول عايزين الدنيا تولع علشان أصلا

مش فاهمين

هى الحرب يا عالم لعبه

دى بتتكلف بالملايين


- امال ح ادفع من جيب مين

إنت حمار وخدوك فى مشمك رحت هناك زى الباقيين

عاملين لجنه

وقال وطنيه

مش ممكن دول وطنيين

وجماعة أنصار الثورة

وفلسطين وهباب الطين

ما نخلينا يا سيدي في حالنا

مالنا ومال الفدائين

هو إحنا اللي نهبنا بلدهم

دول عالم صيع فاقدين

قتلوا الراجل عند الشيراتون

وإحنا إللي طلعنا القاتلين

- وصفي التل دا كلب وخاين


واحد صاحبي مراته مرافقه

وهو مرافق

ييجي عشرين

أمريكا بتزعل وبتحرن

هو إحنا يا عالم ناقصين

مش نستعبر

م إللي جرالنا

ونعيش بقي زى العايشين

دي عيال عملا للشيوعيه

وإحنا عدو الشيوعيين

- ورق دمك بس يا بيه

مين مساعدكو بقالكو سنين


علشان أصلا مش فاهمين

إحنا حيلتنا منين نديهم

ونسددهم بالملايين


- مبدا مين وزكايب مين

هي دى عالم تعرف مبدا

دولا باقول لك

ناس مجانين

اخترعولنا السد العالي

علشان نبقي اشتراكيين

إشتراكيه هناك ف بلدهم

وإحنا ف دارنا

نعيش حرين

عايزين الفلاح الجاهل

يتساوى بالمحترامين

وكمان قال

تحديد ملكيه

أبو ألفين

يدوه خمسين

شغل ملاحده وعالم كفره

ومخالفين أحكام الدين

والعمال رخرين اسم الله

فاهمين روحهم

بني آدمين

ناس عايزين الحرق بولعه

دا كله من الشيوعيين

نشروا لنا الأفكار السوده

أولاد الكلب الملاعين

مين وداك بقي عند الطلبه

انطق قول

اتكلم مين

- هما إيه مطالبهم ؟


- لأمش قصدى

بس أنا باسأل

كانوا طالبين كراريس ومساطر

ولا مطالب ميه الميه

كل الشعب مآمن بيها


مين مجنون بقي

حيمشيها

عايزين يدوا الرتش سلاح

عشان تحصل فيها مجازر

أنا لو أشوف حلوف فلاح

شايل شومه

لازم اهاجر

- لازم بينه وبينك دم


هس اتلم

ثم نحارب ليه

وبايه

بسلاح ما يموتش بعوضه

- ورق دمك بس يا بيه

الحرب ضروره ومفروضه

واهو نفس سلاحنا المظلوم

في فيتنام دابح أمريكا


- بطلوا بقي كدب وبولوتيكا

طب ما الهند بنفس سلاحنا

فى باكستان

بعزقت الغرب


وحتما يعني نخش الحرب

طيب

حاضر

فين المخبر

حتغير رأيك

بالضرب
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 4:30 am

حسبة برما بمناسبة زيارة ابن الهرمة




كشف الرافضين

ببطارية ماركه - نانسين -

يهوديه عربيه

سته مشاغبين

وستميه سته وستين

واتنين صنايعيه

سبعة مداقرين

وسبعميه سبعه وسبعين

غاويين شيوعيه

ألف وستين

وربعميه

منهم عشرين

وتلاته وطنيه

أما الباقيين

فألف ميه وتمانين

طلاب وشضليه

تسعه وتمانين

من إللي راحوا تشرين

تحت المعديه

يبقي موافقين

حسب انضباط القوانين

والحسبه شرعيه

تسعه وتسعين وتسعميه وتسعه وتسعين

من ألف في الميه

أجري التدوين

بمبني بندر قافشين

وبلجنه مدنيه

طرطور الدين

رئيس نيابة هابشين

وشكوكو عدويه

وحسين حابسين ضابط مباحث عابدين

والست سريه

لجنة

عشرين

شبرا ومغاغة

وقلين

أسوان دقهلية


================
شيد قصورك




شيد قصورك ع المزارع

من كدنا وعمل إيدينا

الخمارات جنب المصانع

والسجن مطرح الجنينة

واطلق كلابك

في الشوارع

واقفل زنازينك

علينا

وقلّ نومنا في المضاجع

أدي احنا

نمنا ما اشتهينا

واتقل علينا بالمواجع

احنا اتوجعنا

واكتفينا

وعرفنا

مين سبب جراحنا

وعرفنا روحنا

والتقينا

عمال وفلاحين

وطلبة

دقت ساعتنا

وابتدينا

نسلك طريق

مالهش راجع

والنصر قريب من عنينا

النصر أقرب

من إدينا


====================
كلب الست





فى الزمالك من سنين

وف حما النيل القديم

قصر من عصر اليمين

ملك واحدة من الحريم

صيتها اكتر م الادان

يسمعوه المسلمين

والتتر والتركمان

والهنود والمنبوذين

ست فاقت ع الرجال

فى المقام والاحترام

صيت وشهره وتل مال

يعنى فى غايه التمام

قصره يعني هى كلمة

ليها كلمه فى الحكومه

بس ربك لجل حكمه

قام حرمها م الامومه

والامومه طبع ثابت

جوه حوا من الزمان

تعمل ايه الست جابت

فوكس رومي وله ودان

فوكس دا عقبال املتك

عندة دستة خدامين

يعنى مش موجود فى عيلتك

شخص زية يا اسماعين

واسماعين دا يبقى واحد

م الجماعة التعبانين

اللي داخوا فى المعاهد

والمدارس من سنين

حب يعمل واد فكاكة

يمشي حبة فى الزمالك

والقيامة والفتاكة

يرموا طبعا ع المهالك

عم سمعة من قيامتة

حب يعمل فيها فلة

بعد ما الوظ بيجامتة

اشترى حتة مجله

قول مشي يقرا فى حكاية

من حكايات الغرام

واندماجة فى القرايه

خلا مشيه مش تمام

ع اليمين يحدف بعيد

خطوتين ويروح شمال

لمحه فوكس من الحديد

قال دا صيد

سهل حلال

هب نط فى كرشه دوغري

جاب بيجامته لحد ديلها

اسماعين بدال ما يجري

قال يا رجلي

رجلى مالها ؟

بص شاف الدم سايح

من عاليها ومن واطيها

وياللى جاي

وياللي رايح

المجله مش لا قيها

حبه واتلموا الظنايا

اللى هما البوابين

والحكايه والروايه

قال لهم

دا كلب مين؟؟

كلب مين !!

ما كلب مينشى

سمعه لبخ حبتين

قال واحد منهم

امشى

اللى جابك عنده مين؟

قال دا شارع يا مواشي

والجميع بيمر منه

اللى راكب

اللى ماشى

مستحيل نستغنى عنه

كلمه من دا

وكلمه من دا

ظاطو واترسمت فضيحه

قول نهايته

القصد من دا

اسماعين اكل الطريحه

راحو قسم الشرطه طبعا

والنيابه كفيله بيهم

واترموا فى الحجز جمعا

لما ييجي الدور عليهم

حبة والشاويش امين

قال : سعيد النقشيندي

قام غريم عم اسماعين

قال له:

محسوبك يا افندي

قام سي سمعه

يروح معاه

الشاويش قال :

غور بدمك

راح تعوصنى

وفوق قفاه

كف طرقع

داهيه ف امك

تفتكر يفضل سي سمعه

قد ايه فى القسم نايم ؟

استضافه الحجز جمعه

يا بلاش

ادي العزايم

شاف بلاوي

ما تتحكيش

م الديابه المسجونين

قال يا عالم

يا شاويش

يا نيابه

يامسئولين

خلصوه بعد المناهده

جثه من جحر الديابه

هى يمكن ساعه واحده

كان فى مكتب النيابه

قال له مالك يااسماعين

قال لة زي البمب ... مالي ؟

قال له عضك فوكس فين

قال له سيبنى اروح لحالي

انت شوف سي فوكس يمكن

خد تسمم

غصب عني

الوكيل قال برضة ممكن

والشاويش

قعد يغنى

انت فين والكلب فين

انت قدة يا اسماعين

طب دا كلب الست يا ابني

وانت تطلع ابن مين

بشري لصحاب الديول

واللى له اربع رجول

بشرى لسيادنا البهايم

من جمايس او عجول

اللى صاحبه يا جماعه

له غناوي

فى الاذاعه

راح يدوس فوق الغلابه

والنيابه .. بالبتاعه


===================
تخيل لي الأماني أن حظى



تخيل لي الأماني أن حظى من الدنيا على أرض الشؤون
فأعرضه على قلمي فيجري كعادته بشكو ذي شجون

=====
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 4:32 am

الحبة دول خطررررررررررررررررررر

على الحرنكش


عليا الحرنكش ياريس مبارك
فى عصر مزركش ملون بنارك
لابايعك وابايع حكومة حمارك
ملعون ابو اللى يقدر يقاطع قرارك
نهاره مقندل وليله مبارك
فهمبك وهجص وطلع فى ديننا
اكيد هو طالع يشاهد جمالك
جمالك مبارك
سوزانك سوزاننا
يامحلا حصارك لمصر اللى جالنا
نسيمها فى عصرك بيشوى فى بدننا
اؤيد وابايع فخامة جلالتك
وايد اى واحد بيمسح ريالتك
ولانك سر باتع هاننسى هبالتك
فاقعد ياريس ودلدل حمامتك
حمامة السلام حمامتك ياريس
سلامة الحمامة وسلامتك ياريس
على تل مصر ياريتك تهيص
خرابه فسيحة عليها تمتيس
واامر تطاع فشعبك مفيص

===================
طاطي راسك


طاطي راسك طاطي طاطي .. انت ف وطن ديمقراطي .. انت بتنعم بالحرية .. بس بشرط تكون مطاطي
لما تكون شغال بذمة .. خايف على مصلحة الأمة .. شغلك يطلع من غير لازمة .. علشان مبيعلاش غير واطي طاطي راسك طاطي طاطي .. انت ف وطن ديمقراطي

لما حاميها يكون حراميها .. وبلاده ورا ضهره راميها .. طالع نازل واكل فيها .. مسنود بالبدلة الظباطي طاطي راسك طاطي طاطي .. انت ف وطن ديمقراطي

لما شقاك يصبح مش ليك .. فقرك سد السكة عليك تتلفّت تلقى حواليك .. إما حرامي و إما عقاطي طاطي راسك طاطي طاطي .. انت ف وطن ديمقراطي

لماتلاقي بلاد الدنيا .. فيها البني آدم حاجة تانية .. وانت في الطبقات الدنيا .. قرد مسلسل أو وطواطي طاطي راسك طاطي طاطي .. انت ف وطن ديمقراطي

لما الجهلة يبقوا أمامك .. أو فوقك ماسكين ف زمامك .. ويسوقك ع الهلكة إمامك .. تشرب م السم السقراطي طاطي راسك طاطي طاطي .. انت ف وطن ديمقراطي

لما الكلمة تكون بتدينك .. لما تخبي ف قلبك دينك .. لما الذل أشوفه ف عينك .. هات إحباطك على إحباطي طاطي راسك طاطي طاطي انت ف وطن ديمقراطي .. انت ف وطن ديمقراطي

======================
رسالة للريس


سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين

كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين


==========

بكدة اكون خلصت الموضوع ...الحق انفد بجلدى قبل ما يتقبض عليا هههههههههههههههههههههههههههههههه
يارب الموضوع يكون عجبكوا...
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
koki2007
عضو فعال
عضو فعال
avatar

عدد الرسائل : 256
العمر : 31
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   الأربعاء نوفمبر 14, 2007 2:57 pm

مجهود كبيييييييييييييييييير ورائع
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بقايا شاعر
مراقب متميز
مراقب متميز
avatar

عدد الرسائل : 244
العمر : 41
تاريخ التسجيل : 01/11/2007

مُساهمةموضوع: رد: احمد فؤاد نجم ( شاعرنا الاسطورة ) نبذة عنة   السبت نوفمبر 24, 2007 11:01 am

ربنا يخليكى ويشرفنى


ويسعدنى مرورك



وليد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
احمد فؤاد نجم ( شاعرنا الاسطورة ) نبذة عنة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
www.mr.abdalla.com :: قم الشعر والروايات-
انتقل الى: